區議員席位尚未到手，一向野心大的袁彌明已有新目標，吼中「人民力量」的主席劉嘉鴻。周日（ 3日），本刊拍得二人在銅鑼灣繑手行街。袁替男方選購恤衫時，更大方從後胸壓對方，之後二人又孖住返男方屋企，關係不言而喻。提到這樁政壇新戀情，袁彌明發揮政治智慧說：「另一半最緊要政治理念一致，但即使拍拖都唔會減低我從政嘅決心。」
銳意從政的袁彌明近日頻頻現身政治活動，一時到立法會門外靜坐撐拉布，一時又走到旺角街頭拉橫額促請政府發免費電視牌照，更經常落區與市民打好關係。不過袁彌明為市民謀福利的同時，亦順手幫自己爭取幸福。
體貼度身
袁彌明與劉嘉鴻到位於銅鑼灣的英國品牌「 Jack Wills」買恤衫。袁拿起一件紫色恤衫後，第一時間便放在劉身上度身。
主動埋單
袁彌明為冧劉嘉鴻，更主動送贈這件$750元的恤衫俾男方。
親密繑手
二人買完衫後齊齊行街，其間袁彌明更情不自禁地挽著劉嘉鴻手臂，而劉亦十分受落。
齊齊返歸
劉嘉鴻之後帶袁彌明返回男方位於銅鑼灣的寓所，二人密會一小時後才落樓。
拉布傳情
據知，「人民力量」黨成員之一的袁彌明，近月與黨主席劉嘉鴻過從甚密，有不少黨員就指二人經常留守黨總部開會傾通宵，之後更孖住齊齊走。知情人士說：「佢哋傾到好夜至走，第二日又會約埋一齊返總部開會。佢哋好夾，劉主席未出聲 Erica（袁之洋名）已經知道佢需要啲乜。」上月的立法會拉布戰，有人就目睹劉嘉鴻對袁彌明關懷備至，態度儼如一對情侶，「成班黨員之前發起喺立法會門外聲援拉布，喺休息期間，劉主席主動除件西裝褸俾 Erica當被冚。」
近日袁彌明和劉嘉鴻經常孖咇上陣宣傳政綱。周日（ 3日）兩人除在柴灣搞牙科保健講座外，周一（ 4日）更聯同黃毓民到銅鑼灣街頭嗌咪為六四平反（右圖）。
「人民力量」上月中舉行「拉布抗惡法」集會，劉嘉鴻（左二）和袁彌明亦有份出席，二人之後更於立法會外抗議超過六小時。《蘋果日報》圖片
街頭繑手
袁彌明周日（ 3日）下午要拍住劉嘉鴻到柴灣宣傳政綱，不過開工前，二人便先相約在銅鑼灣拍拖，第一站就去買男裝。記者發現袁彌明十分細心，為劉嘉鴻挑選合身恤衫時，經常幫他整理衫袖和衫領，十足女友咁款。記者當時聽到她溫柔地說：「都話你要揀中碼至啱㗎啦！再改短埋個袖就 fit曬！你鍾意嘅話，我送俾你啦！」趁男方換衫時，袁立即去收銀處俾錢。二人買完衫再漫步銅鑼灣街頭，此時袁熱情地挽著男方手臂。袁送衫之餘，亦送埋上門，與劉嘉鴻齊齊返回男方位於銅鑼灣的寓所。大概一小時後，二人齊齊落樓，出發到柴灣開工。
袁：佢對我好重要
周二（ 5日），記者致電袁彌明，她直認對劉嘉鴻有好感：「我有機會參選區議員，佢（劉嘉鴻）呢幾個月對我好重要。佢係一個好有才華嘅男人，我的確好仰慕佢。不過即使拍拖都唔會減低我從政嘅決心。」而劉嘉鴻則說：「我哋嘅政治理念相似，大家傾得埋，佢亦係一個細心、工作有衝勁嘅女仔。（拍拖幾耐？）依家想專注番事業先，其他嘢之後再講啦！」
多情才女
前度《蘋果日報》圖片
今年 31歲的袁彌明， 05年參選港姐，兩年後和無綫決裂，正式轉型搞美容和飲食生意。近年袁彌明亦不時帶埋另一半出席電影首映，可惜兩段感情最終沒結果。
兩度情傷
袁彌明只做過兩年全職藝人，圈中緋聞男友只有崔建邦。袁從商後更和一名金融才俊撻著，當時她更帶埋男友撐自己新舖開張（圖），但甜蜜兩年後竟告分手收場。去年中，袁就帶新男友現身首映，更暗示有結婚打算，可惜一直冇下文。
轉向從商
袁退出娛圈後先冒險搞美容產品水貨生意，再開埋樓上舖賺第一桶金，之後她愈搞愈大，與胞姊夾份開乳酪店（圖）。沾手政治後，袁仍繼續管理三間美容產品樓上舖，而乳酪生意則交由胞姊打理。
政壇新星起底
今年 36歲的劉嘉鴻，外形並不出眾，身高只有五呎六，體形略胖。不過劉學歷不錯，中文大學畢業的他，平時喜歡周遊列國兼聽古典音樂。劉嘉鴻去年出任「人民力量」主席，曾出戰大坑選區區議員，最終以大比數敗給新民黨。為了專心從政，他年初索性放棄年薪過百萬的基金精算師一職。
No comments:
Post a Comment